بیوی کے قتل کے الزام میں آدمی جیل کی ہوا کھا آیا، لیکن بیوی کئی سال بعد اپنے آشنا کے ساتھ منظر عام پر آگئی
نئی دہلی (ڈیلی پاکستان آن لائن) بھارتی ریاست کرناٹک کے ضلع کوڈاگو کی تحصیل کوشال نگر کے گاؤں باسون ہلی میں ایک ایسا واقعہ پیش آیا جس نے سب کو حیرت میں ڈال دیا۔ مقامی رہائشی سریش جو اپنی بیوی مالگی کے لاپتہ ہونے کے بعد کئی برسوں تک غم زدہ رہا، اس وقت ہکا بکا رہ گیا جب وہی عورت آشنا کے ساتھ زندہ سلامت واپس شہر میں آ گئی۔
این ڈی ٹی وی کے مطابق یہ معاملہ 2019 میں اس وقت شروع ہوا جب مالگی اچانک بغیر کوئی اطلاع دیے غائب ہو گئی۔ سریش نے اپنے رشتہ داروں سے معلومات حاصل کرنے کی کوشش کی تو معلوم ہوا کہ مالگی کے کسی مرد سے ناجائز تعلقات تھے۔ اس نے بیوی سے منت سماجت کی کہ کم از کم بچوں کے لیے رابطہ میں رہے مگر مالگی نے کوئی جواب نہ دیا۔ سنہ 2021 میں اس نے کوشال نگر پولیس میں گمشدگی کی رپورٹ درج کرائی کیونکہ وہ خدشہ ظاہر کر رہا تھا کہ کہیں اسے ہی کسی جرم میں نہ پھنسادیا جائے۔
سنہ 2022 میں پولیس نے سریش کو بلا کر بتایا کہ بیٹادا پورا کے قریب ایک انسانی ڈھانچہ ملا ہے جو غالباً اس کی بیوی کا ہے۔ سریش اپنی ساس کے ساتھ موقع پر پہنچا، پولیس نے کہا کہ یہ اس کی بیوی کی باقیات ہیں۔ دل پر پتھر رکھ کر اس نے اس کی آخری رسومات ادا کیں۔ مگر جلد ہی پولیس نے یو ٹرن لیتے ہوئے سریش پر ہی بیوی کے قتل کا الزام لگا دیا اور اسے جیل بھیج دیا۔ بار بار انکار کے باوجود سریش کو مجرم تصور کیا گیا۔ تاہم جب فرانزک ڈی این اے ٹیسٹ سے معلوم ہوا کہ وہ باقیات مالگی کی نہیں تھیں تو عدالت نے سریش کو باعزت بری کر دیا۔
یہ معاملہ یکم اپریل 2025 کو نیا رخ اس وقت اختیار کر گیا جب سریش کے دوستوں نے مالگی کو مدیکیری کے ایک ہوٹل میں اپنے آشنا کے ساتھ دیکھا۔ انہوں نے تصاویر لیں اور پولیس کو اطلاع دی۔ پولیس نے فوراً مالگی کو حراست میں لے کر میسور کی عدالت میں پیش کیا۔
