لاہور: الیکٹرک بسوں کے پائلٹ پراجیکٹ کا آغاز، ٹیسٹ رن شروع

لاہور ( ڈیلی پاکستان آن لائن ) صوبائی دارالحکومت لاہور میں 27 الیکٹرک بسوں کے پائلٹ پراجیکٹ کا آغاز ہو گیا، ٹیسٹ رن شروع کردیا گیا۔
نجی ٹی وی دنیا نیوز کے مطابق پنجاب حکومت کی طرف سے 27 ایکو فرینڈلی بسوں کا آغاز کر دیا گیا، گرین ٹاون سے ریلوے سٹیشن تک الیکٹرک بسوں کا ٹیسٹ رن کیا جارہا ہے ، پائلٹ پراجیکٹ کے تحت لاہور کی سڑکوں پر پہلی بار الیکٹرک بسوں کا سفر شروع ہوا۔
ایکو فرینڈلی بسیں گرین ٹاون سے ریلوے سٹیشن تک 21 کلومیٹر طویل روٹ پر چلائی جارہی ہیں، الیکٹرک بسوں میں جدید سہولیات فراہم کی گئی ہیں ، بسوں میں جی پی ایس، وائی فائی، یو ایس بی پورٹس اور خصوصی افراد کے لئے ریمپ اور مخصوص نشستوں کی سہولت دی گئی ہے۔
بسوں میں خواتین کے لئے علیحدہ سیکشن اور ہراسمنٹ سے بچاو  کے لئے کیمرے بھی نصب کئے گئے ہیں، بسوں کی باقاعدہ سروس 16 فروری سے شروع ہوگی ، بسوں سے روزانہ تقریباً 17 ہزار افر اد مستفید ہوں گے۔
کرایہ کی ادائیگی کے لئے ڈیجیٹل والٹ اور کارڈز کا استعمال ممکن ہوگا ، مخصوص ایپ کے ذریعے بس کی ٹریکنگ بھی کی جا سکے گی۔