ابوبکر طلحہ اور بسمیل ضیاء نے ایچی سن کالج جونیئر ٹینس چیمپئن شپ میں ٹائٹل جیت لیے
لاہور(ڈیلی پاکستان آن لائن) ابوبکر طلحہ اور بسمیل ضیاء نے ایچی سن کالج لاہور میں ہونے والی ایچی سن کالج جونیئر ٹینس چیمپئن شپ 2024 میں لڑکوں اور لڑکیوں کے انڈر 18 ٹائٹل اپنے نام کر لیے۔
لڑکوں کے انڈر 18 فائنل میں ابوبکر طلحہ، جو فیڈرل گورنمنٹ ایجوکیشنل انسٹی ٹیوشنز (FGEI) کے طالب علم اور SA گارڈنز کے سپانسرڈ کھلاڑی ہیں، نے شاندار کارکردگی دکھاتے ہوئے 2 ٹائٹل جیتے۔ پہلے انہوں نے انڈر 18 سنگلز کا ٹائٹل جیتا اور پھر انڈر 18 ڈبلز کا ٹائٹل بھی اپنے نام کیا۔ انڈر 18 سنگلز فائنل میں ابوبکر نے اسد زمان کو 6-2، 6-3 سے شکست دے کر چیمپئن شپ ٹائٹل اپنے نام کیا۔ بعد میں، ابوبکر نے حیدر علی رضوان کے ساتھ مل کر لڑکوں کے انڈر 18 ڈبلز فائنل میں کشان طارق اور یفات ندیم کو 6-2، 6-2 سے ہرایا۔
لڑکیوں کی طرف، بسمیل ضیاء، جو علی ایمبرائڈری ملز کی سپانسرڈ ہیں اور مشہور کوچ راشد ملک کی نگرانی میں تربیت حاصل کر رہی ہیں، نے انڈر 18 فائنل میں رومیسہ ملک کو 6-2، 6-3 سے شکست دے کر شاندار کارکردگی کا مظاہرہ کیا۔ بسمیل ضیا ءنے علی ایمبرائڈری ملز کے سی ای او طارق زمان کا شکریہ ادا کیا اور اپنے کوچ راشد ملک کی تعریف کی جن کی رہنمائی اور تربیت نے انہیں قومی ٹینس سرکٹ میں نمایاں مقام تک پہنچنے میں مدد دی۔
بسمیل ضیاء کی دوہری کامیابی کی کوشش لڑکیوں کے انڈر 14 فائنل میں ناکام رہی، جہاں حاجرہ رانا نے 4-2، 4-2 سے کامیابی حاصل کی۔ حاجرہ نے لڑکیوں کے انڈر 12 فائنل میں خدیجہ خلیل کو 4-1، 4-0 سے شکست دے کر 2 ٹائٹل اپنے نام کیے۔ دیگر اہم نتائج میں حسن عثمانی کی فتح شامل ہے، جو بیکن ہاؤس سکول ڈیفنس کیمپس کے ایک ہونہار طالب علم ہیں۔ انہوں نے لڑکوں کے انڈر 14 فائنل میں عمر جواد کو 6-0، 6-2 سے شکست دی۔
لڑکوں کے انڈر 12 فائنل میں، راشد علی بچانی نے محمد معاذ کو دو قریبی سیٹوں میں 5-4، 5-4 سے شکست دے کر ٹائٹل جیتا۔ ڈبلز فائنل میں، محمد معاذ اور محمد ایان نے لڑکوں/لڑکیوں کے انڈر 12 کیٹیگری میں راشد علی بچانی اور ایم ابراہیم حسین گل کو 4-0، 5-4 سے شکست دی۔
لڑکوں کے انڈر 16 (پنجاب رینکنگ) فائنل میں، عبدالباسط نے امیر مزاری کو 6-2 سے شکست دی۔ لڑکوں/لڑکیوں کے انڈر 10 (پنجاب رینکنگ) فائنل میں، محمد ایان نے ایم ابراہیم حسین گل کو 7-5 سے ہرایا۔
ایچی سن کالج لاہور کے عمر زمان تقریب کے مہمان خصوصی تھے، جنہوں نے نوجوان کھلاڑیوں کو ان کی شاندار کارکردگی پر مبارکباد دی اور انہیں ٹینس کے میدان میں اپنی محنت جاری رکھنے کی ترغیب دی۔ پی ایل ٹی اے کے سینئر ایگزیکٹو نائب صدر راشد ملک نے ایچی سن کالج کے پرنسپل ایس ایم تراب حسین اور انتظامیہ کا شکریہ ادا کیا اور امید ظاہر کی کہ وہ پاکستان میں کھیلوں، خصوصاً ٹینس کی سرپرستی جاری رکھیں گے۔
