رجب المرجب کا چاند کب نظر آئے گا، رویتِ ہلال کونسل نے وقت بتادیا

لاہور(ڈیلی پاکستان آن لائن )رجب المرجب کا چاند نظر آنے کے حوالے سے رویتِ ہلال کونسل کے سیکرٹری نے وقت بتا دیا۔
نجی ٹی وی ایکسپریس نیوز کے مطابق سیکرٹری جنرل رویتِ ہلال ریسرچ کونسل خالد اعجاز مفتی نے بتایا کہ 29 جمادی الثانی بروز بدھ یکم جنوری 2025ءکی شام موسم صاف ہونے پر ہلال کی رویت بہ آسانی ہو جائے گی۔
انہوں نے بتایا کہ یکم رجب المرجب جمعرات 2 جنوری کو ہو گی۔ نیا چاند منگل 31 دسمبر 2024ء کو پاکستانی وقت کے مطابق قبل از صبح 3 بج کر 27 منٹ پر پیدا ہو گا اور 29 جمادی الثانی یعنی بدھ یکم جنوری 2025ءکی شام غروبِ آفتاب کے وقت چاند کی عمر جو کم از کم 19 گھنٹوں سے زائد ہونی چاہئے، وہ پاکستان کے تمام علاقوں میں 37 گھنٹوں سے بھی زائد ہوچکی ہوگی۔
دوسری جانب غروبِ شمس اور غروبِ قمر کے درمیان فرق جو کم از کم 40 منٹ ہونا چاہئے، وہ گلگت اور مظفر آباد میں 80 منٹ ، چارسدہ ، پشاور ، راولپنڈی اور لاہور میں 81 منٹ ، کوئٹہ میں 83 منٹ جبکہ سب سے زیادہ کراچی اور جیوانی میں 85 منٹ ہو گا۔
انہوں نے مزید بتایا کہ پاکستان کے جس علاقے میں بھی مطلع صاف ہوگا، وہاں بدھ یکم جنوری کی شام ہلال کی رویت بہ آسانی ممکن ہو گی۔