سلطان راہی کی 29ویں برسی9جنوری کو منائی جائیگی
لاہور(فلم رپورٹر)پنجابی فلموں کے نامور اداکار سلطان راہی کی 29ویں برسی 9 جنوری کو منائی جائے گی۔ 1980ء کے بعد سلطان راہی کا فلمی کیرئیر اپنے عروج پر پہنچ گیا اور وہ اپنی موت تک پنجابی فلموں کے معروف ہیرو رہے انہوں نے اپنے 32برس سالہ فلمی کیرئیر کے دوران سات سو سے زائد فلموں میں اداکاری کرکے عالمی ریکارڈ قائم کیا جن میں پانچ سو فلموں میں انہوں نے بطور ہیرو کردار ادا کیا۔سلطان راہی نے 1964ء میں بطور ایکسٹر ااداکار اپنے فلمی کیریئر کا آغاز کیا۔ ابتداء میں سلطان راہی نے ڈائریکٹر مشتاق عباس زیدی کی شہرہ آفاق فلم ”یاراں نال بہاراں“سمیت متعدد فلموں میں ثانوی نوعیت کے کردار ادا کئے۔ اس دوران پنجابی فلم ” بشیرا “ کی کامیابی نے انہیں سپر سٹار بنا دیا سلطان راہی اور مصطفےٰ قریشی کی جوڑی فلم کی کامیابی کی ضمانت بن گئی۔
ان کی فلم ” مولا جٹ“ نے باکس آفس پر کامیابی کے ریکارڈ قائم کئے۔ ان کی دیگر کامیاب فلموں میں ’سالا صاحب،”چن وریام“،”اتھرا پتر“،”ملے گا ظلم دا بدلہ“، ”وحشی جٹ‘‘، ’شیر خان‘، ’’شعلے‘‘، ’’آخری جنگ‘‘،”جرنیل سنگھ“، ”دو بیگھہ زمین“،”شیراں دے پتر“،”سخی بادشاہ“ اور دیگر قابل ذکر ہیں۔ سلطان راہی کا نام گینز بک آف ورلڈ ریکارڈ میں موجود ہے انہیں 150سے زائد فلمی ایوارڈز سے نوازا گیا۔ سلطان راہی کی مقبول ترین فلمی ہیروئن میں آسیہ،انجمن،صائمہ،گوری،نیلی،بابرہ شریف قابل ذکر ہیں۔ فن کے سلطان سلطان راہی کو 9جنوری 1996ء کو گوجرانوالہ کے قریب نامعلوم ڈاکوؤں نے فائرنگ کرکے موت کے گھاٹ اتار دیا تھا۔
