بانی پی ٹی آئی اور وزیر اعلیٰ خیبر پختونخوا کی ملاقات کی اندونی کہانی سامنے آگئی

راولپنڈی ( ڈیلی پاکستان آن لائن ) بانی پی ٹی آئی اور وزیر اعلیٰ خیبر پختونخوا کی ملاقات کی اندرونی کہانی سامنے آگئی۔

تفصیلات کے مطابق  ملاقات میں علی امین گنڈاپور نے بانی کو صوبے میں تنظیم سازی سے متعلق شکایت کی۔ وزیر اعلیٰ نے2 وزراء کی کارکردگی سے متعلق بانی پی ٹی آئی کو شکایت لگائی، بانی نے علی امین  گنڈا پور کو وزراء کے خلاف کارروائی کا اختیار دے دیا۔

"جنگ " نے ذرائع کے حوالے سے بتایا کہ دونوں وزراء کو کابینہ سے ہٹائے جانے یا قلم دان تبدیل کرنے کا امکان ہے،دونوں وزراء پی ٹی آئی کے سینئر رہنماؤں کے بھائی ہیں، علی امین نے بابر سلیم سواتی اور اعظم سواتی کے تنازع پر بھی بات چیت کی۔

علی امین گنڈاپور کی  بانی پی ٹی آئی سے عاطف خان اور شیر ارباب کو دوبارہ عہدوں پر رکھنے سے متعلق بھی گفتگو ہوئی، وزیر اعلیٰ کے پی نے کہا کہ آپ کے کہنے پر عہدوں سے ہٹایا گیا تھا دوبارہ شامل کیا گیا۔

بانی پی ٹی آئی نے علی امین کو جواب دیا کہ اس معاملے پر متعلقہ قیادت سے پوچھوں گا، بانی پی ٹی آئی نے علی امین کو معاملہ افہام و تفہیم سے حل کرنے کا کہا، علی امین نے بانی پی ٹی آئی کو مختلف سطح پر جاری مذاکرات سے آگاہ کیا۔

دوسری جانب مرکزی سیکریٹری اطلاعات پی ٹی آئی شیخ وقاص اکرم نے" جیو نیوز "سے گفتگو کرتے ہوئے بتایا کہ بانی پی ٹی آئی سے علی امین کی ملاقات سیاسی اور پارٹی امور سے متعلق تھی، ملاقات میں خیبر پختونخوا حکومت سے متعلق بھی گفتگو ہوئی۔ علی امین کو بانی پی ٹی آئی کی جانب سے اہم احکامات ملے ہیں۔