پی ٹی آئی کو ان ایک کروڑ لوگوں کی آہ لگی جو نوکری کے آسرے میں تھے: گورنر سندھ
کراچی(ڈیلی پاکستان آن لائن )گورنر سندھ کامران ٹیسوری نے کہا ہے کہ پی ٹی آئی کو ان ایک کروڑ لوگوں کی آہ لگ گئی جو نوکری کے آسرے میں تھے۔
نجی ٹی وی جیو نیوز کے مطابق گورنر سندھ سحری کیلئے کراچی کے علاقے سرجانی ٹاون پہنچے تو ان کا استقبال گل پاشی اور آتشبازی کے ذریعے کیا گیا۔اس موقع پر میڈیا سے گفتگو کرتے ہوئے کامران خان ٹیسوری نے کہا کہ گورنر ہاؤس کی دیواریں گرانے کے دعویداروں نے دیواریں اونچی کی تھیں۔
انہوں نے پی ٹی آئی کو مشورہ دیا کہ امریکی وزارت خارجہ پر ماتھا ٹیکنے اور ڈونلڈ ٹرمپ کے گھٹنوں پر ہاتھ رکھنے کے بجائے اللہ سے معافی مانگے۔
گورنرسندھ کا کہنا تھا کہ پی ٹی آئی کو ان ایک کروڑ لوگوں کی آہ لگ گئی جو نوکری کے آسرے میں تھے، لوگ کہتے ہیں امید عمران خان نے دلوائی تھی۔
اس موقع پر موجود ڈاکٹر فاروق ستار نے کہا کہ کامران خان ٹیسوری نے ایک نمائشی گورنری کو عوامی عہدہ بنادیا۔
اس کے علاوہ گورنر سندھ کو خاتون نے شوہر کے مظالم کابتایا تو انہوں نے خاتون کو انصاف کا یقین دلایا اور اس کے بچوں کو تعلیم دلوانے کا اعلان بھی کیا۔
