نواز شریف کے پوتے کی شادی: جاتی امراء سج گیا، کئی ملکوں کے مہمان شریک،بارات میں 500 اور ولیمے میں 700 افراد مدعو
لاہور(ڈیلی پاکستان آن لائن )نواز شریف کے پوتے کی شادی کے سلسلے میں جاتی امرا ءکو سجا دیا گیا جبکہ تقریبات میں بھارت سمیت کئی ملکوں کے مہمان شریک ہیں۔
نجی ٹی وی" ایکسپریس نیوز" کے مطابق پاکستان مسلم لیگ (ن) کے صدر اور سابق وزیراعظم نواز شریف کے پوتے زید حسین نواز کی شادی کی تقریبات جاری ہیں۔ ان کی بارات آج جاتی امراء سے رائیونڈ روڈ پر نجی ہوٹل روانہ ہو گی۔
زید حسین نواز کی بارات میں قریبی رشتے دار اور غیر ملکی مہمانوں سمیت سیاسی شخصیات شریک کریں گی جبکہ ولیمہ کل اتوار 29 دسمبر کو جاتی امرا ءمیں ہو گا۔ بارات کی تقریب میں 500 اور ولیمے میں 700 افراد کو مدعو کیا گیا ہے۔
قبل ازیں سابق وزیر اعظم نواز شریف کے پوتے اور حسین نواز کے صاحبزادے زید حسین نواز کے نکاح اور رسم حنا کی تقریب جاتی امراء میں منعقد کی گئی تھی۔
زید حسین نواز کی شادی کی تقریبات کے سلسلے میں جاتی امراء کو برقی قمقموں سے روشن کیا گیا ہے۔ شادی کی تقریبات میں امریکا، برطانیہ، سعودی عرب، قطر، عرب امارات اور بھارت سے مہمان شریک ہو رہے ہیں۔
شادی میں شرکت کے لیے حسین نواز، ان کی فیملی اور ان کی بہن اسما ڈار بھی موجود ہیں جبکہ مہمانوں کی سیکیورٹی کا انتظام پنجاب پولیس کر رہی ہے۔ تقاریب کے دوران جاتی امراء جانے والی سڑک کے اطراف درختوں کو لائٹیں لگا کر نمایاں کیا گیا ہے اور جگہ جگہ پھولوں کے گملے رکھ کر علاقے کو سجا دیا گیا ہے۔
