ملازمت کیلئے ازبکستان جانے والے پاکستانیوں پر پابندی کا اعلان
اسلام آباد(ڈیلی پاکستان آن لائن)ازبکستان میں ملازمت کیلئے جانے والے پاکستانیوں پر پابندی عائد کرنے کا اعلان کیا گیا ہے۔
نجی ٹی وی چینل آج نیوز کی رپورٹ کے مطابق بیورو آف امیگریشن اینڈ اوورسیز ایمپلائمنٹ نے ازبکستان میں ملازمت کے خواہشمند پاکستانیوں کے عمل پر عارضی پابندی کے احکامات جاری کیے ہیں۔یہ فیصلہ وزارت خارجہ کی جانب سے موصول ہونے والی ان رپورٹس کے بعد کیا گیا جن میں کہا گیا تھا کہ ازبکستان میں مقیم پاکستانی کارکنوں کو تنخواہیں نہ ملنے اور کام کیلئے نامناسب حالات کا سامنا ہے۔
غیر ملکی خبررساں ادارے کی رپورٹ کے مطابق اس ضمن میں جاری کردہ اعلامیے میں ملک بھر کے تمام پروٹیکٹوریٹ دفاتر کو ہدایات جاری کی گئی ہیں کہ وہ فوری طور پر ازبکستان کے لیے مزید کارکنوں کے ’پروٹیکٹر‘ روک دیں۔
خیال رہے کہ بیرون ملک ملازمت کیلئے حکومت پاسپورٹ پر ’پروٹیکٹر‘ لگا کر دیتی ہے جس کے بغیر پاکستانی بیرونِ ملک ملازمت کیلئے سفر نہیں کر سکتا، یہ ایک مہر یا سٹکر ہوتا ہے جو اب بارکوڈ کے ساتھ لگایا جاتا ہے۔پروٹیکٹر کے حوالے سے حکومت کا یہ حکم پہلے سے دیئے گئے اجازت ناموں اور اوورسیز ایمپلائمنٹ پروموٹرز یا براہ راست ملازمت کے خواہشمند افراد کی درخواستوں پر بھی لاگو ہو گا۔
نوٹیفکیشن میں کہا گیا کہ اگر کسی ہنگامی صورت حال میں درخواست موصول ہو تو پروٹیکٹوریٹ آف امیگرنٹس متعلقہ کیس پاکستانی سفارت خانے کو بھیج سکتے ہیں لیکن اس کیلئے تمام ضروری دستاویزات اور آجر کی مکمل تصدیق حاصل کرنا ضروری ہوگا۔ سفارت خانہ کی اجازت کے بعد ہی متعلقہ درخواست پر پروٹیکٹر لگایا جائے۔