بیرون ملک مقیم شوہر سے فون پرجھگڑا ، بیوی نے 3معصوم بچوں کیساتھ وہ سلوک کیا کہ روح کانپ اٹھے
سیالکوٹ( ڈیلی پاکستان آن لائن )بیرون ملک مقیم شوہر سے فون پرجھگڑا ہونے کے بعد بیوی نے 3معصوم بچوں کیساتھ وہ سلوک کیا کہ روح کانپ اٹھے۔
تفصیلات کے مطابق کوٹلی لوہاراں کے علاقہ میہموجوئیہ میں ایک افسوسناک واقعہ پیش آیا جہاں ایک ماں نے مبینہ طور پر اپنے تین بچوں کو زہر پلا دیا جس کے باعث ان کی7 سالہ بیٹی جاں بحق ہوگئی جبکہ دیگر 2 بچوں کی حالت تشویش ناک ہے۔
"ایکسپریس نیوز " کے مطابق پولیس ترجمان نے بتایا ہے کہ خاتون کا بیرون ملک مقیم شوہر سے فون پر جھگڑا ہوا جس کے بعد اس نے اپنے3 بچوں کو زہر دے دیا۔ زہر دیئے جانے والے بچوں میں 7 سالہ ام عمارہ،9 سالہ محمد غازی اور 3سالہ محمد حمزہ شامل ہیں۔ افسوسناک طور پر ام عمارہ زہر کے اثر سے جاں بحق ہو گئی جبکہ محمد غازی اور محمد حمزہ کو تشویشناک حالت میں اسپتال منتقل کر دیا گیا ہے۔ایک بچے کی حالت انتہائی تشویشناک ہے جس کی وجہ سے اہلخانہ شدید غم و غصے میں ہیں۔
پولیس کے مطابق واقعہ کی ایف آئی آر بچوں کے چچا کی مدعیت میں درج کر لی گئی ہے اور ملزمہ سدرہ محسن فرار ہو چکی ہے۔ پولیس کا کہنا ہے کہ ملزمہ کی گرفتاری کے لیے مختلف مقامات پر چھاپے مارے جا رہے ہیں اور جلد ہی گرفتار کر لیا جائے گا۔
