راولپنڈی میں غیرقانونی بس اڈوں اور تجاوزات کیخلاف آپریشن کلین اپ ، نالہ لئی منصوبے کے حوالے سے اہم حکم جاری

راولپنڈی  ( ڈیلی پاکستان آن لائن )راولپنڈی میں غیرقانونی بس اڈوں اور تجاوزات  کیخلاف آپریشن کلین اپ کیا گیا جبکہ   نالہ لئی منصوبے کے حوالے سے اہم حکم  آ گیا ۔

تفصیلات کے مطابق وزیراعلیٰ پنجاب مریم نواز  کے ویژن کے تحت راولپنڈی شہر سمیت پورے ڈویژن کی خوبصورتی، صفائی اورپارکس کی بہتری کے لیے جامع اقدامات کیے جارہے ہیں۔وزیراعلیٰ  کی ہدایت پر مری روڈ کی بیوٹیفیکیشن، اپ لفٹنگ، پیر ودھائی اور فیض آباد سمیت تمام غیرقانونی بس اڈے، تجاوزات کے خاتمے اور منشیات کے خلاف گرینڈ آپریشن کلین اپ کیا گیا۔

 وزیراعلیٰ مریم نواز کی ہدایت پر پنجاب کی سینئر صوبائی وزیر مریم اورنگزیب کی زیر صدارت کمشنر آفس راولپنڈی میں 3 گھنٹے طویل جائزہ اجلاس ہوا۔ سینئر صوبائی وزیر مریم اورنگزیب نے وزیراعلیٰ مریم نواز کی طرف سے عیدالفطر پر بہترین انتظامات،صفائی ستھرائی اور مسافروں کو اضافی کرائے کی واپسی پر انتظامیہ اور تمام محکموں کو شاباش دی۔ سینئر صوبائی وزیر نے نالہ لئی منصوبے کی فیزیبلٹی3 ماہ میں مکمل، دسمبر میں رنگ روڈ کی تکمیل یقینی بنانے کی ہدایت کی۔ اجلاس میں پورے راولپنڈی ڈویژن میں ستھرا پنجاب پر عملدرآمد کا جائزہ لیا گیا جس پر سامنے آنے والی خامیوں کو دور کرنے کی ہدایت کی گئی۔ 3 دن کی ڈیڈ لائن میں پیرودھائی سے غیرقانونی بس اڈے ختم کرنے پر وزیر اعلیٰ مریم نواز کی ضلعی انتظامیہ اور پولیس کو شاباش دی۔

سینئر صوبائی وزیر مریم اورنگزیب نے وزیراعلیٰ  کی ہدایت پر فیض آباد سے بھی بسوں کے اڈے،تجاوزات کے خاتمے اور شہریوں کی سہولت کو یقینی بنانے کی ہدایت کی۔ وزیراعلیٰ  نے اگلے جمعہ تک پورے مری روڈ کی بیوٹیفکیشن،صفائی اور اپ لفٹنگ پلان کی بھی منظوری دے رکھی ہے۔

 سینئر صوبائی وزیر مریم اورنگزیب نے کہا کہ پورے راولپنڈی ڈویژن میں تجاوزات کے خاتمے کا عوام نے خیر مقدم کیا ہے۔ وزیر اعلیٰ پنجاب نے پولیس حکام کو راولپنڈی ڈویژن کو منشیات سے پاک کرنے کا ٹاسک دیا ہے۔ وزیراعلیٰ  نے راولپنڈی ڈویژن کے سرحدی علاقوں میں نگرانی اور گشت بڑھانے کی ہدایت کی ہے۔ وزیراعلیٰ مریم نواز کی ہدایت پرمنشیات کی سمگلنگ اور فروخت میں ملوث مافیا کے خلاف کریک ڈاؤن کی بھی منظوری دی گئی۔

 بعد ازاں سینئر منسٹرمریم اورنگزیب نے حکام کے ہمراہ راولپنڈی کے مختلف ہسپتالوں کے علاوہ راجہ بازار، فوارہ چوک اور صدر کابھی دورہ کیا۔ سینئر صوبائی وزیر نے تجاوزات کے خاتمے کے اب تک کے اقدامات، ہسپتالوں میں مریضوں کے علاج معالجے کے انتظامات کا جائزہ لیا۔