ٹرمپ کے ہوٹل کے باہر گاڑی میں دھماکہ، گاڑی کس کی تھی ؟ تہلکہ خیز انکشاف
لاس ویگاس (ویب ڈیسک) امریکا کے شہر لاس ویگاس میں ٹرمپ ہوٹل کے باہر ایلون مسک کی مشہور الیکٹرک کار میں پُراسرار دھماکے کی وجہ سے 1 شخص ہلاک جبکہ 7 دیگر افراد زخمی ہو گئے۔
غیر ملکی میڈیا کے مطابق ٹیسلا کی ’سائبر ٹرک‘ کار نومنتخب صدر ڈونلڈ ٹرمپ کے ٹرمپ انٹرنیشنل ہوٹل کے باہر کھڑی تھی کہ اچانک وہ زوردار دھماکے سے پھٹ گئی، جس کے بعد اس میں آگ لگ گئی، جس کی وجہ سے کار میں بیٹھا ایک شخص ہلاک ہو گیا۔دھماکے کے بعد پولیس نے چاروں طرف سے ہوٹل کو گھیر لیا اور زخمیوں کو ہسپتال منتقل کیا گیا۔ پولیس کے مطابق زخمی ہونے والے افراد کو معمولی زخم آئے ہیں۔
پولیس کا کہنا ہے کہ فی الحال دھماکے کی نوعیت کے بارے میں کہنا قبل از وقت ہے، تحقیقات جاری ہیں۔الیکٹرک کار بنانے والی کمپنی ٹیسلا کے مالک اور دنیا کے امیر ترین شخص ایلون مسک نے اطلاع ملنے پر ایکس پر ایک بیان جاری کیا ہے جس میں کہا ہے کہ ایسا پہلے کبھی نہیں دیکھا، سینیئر ٹیم معاملے کی تحقیقات کر رہی ہے جیسے ہی کچھ معلومات حاصل ہوں گی سب کے ساتھ شیئر کی جائیں گی۔
دوسری جانب نو منتخب صدر ڈونلڈ ٹرمپ کو ان کے ہوٹل کے باہر ہونے والے دھماکے کی اطلاع کر دی گئی ہے انہوں نے اس حادثے پر افسوس کا اظہار کیا اور ہر قسم کی مدد کی پیشکش کی ہے۔
