الطاف میرے مؤقف کی حمایت کرتے ہیں تو مجھے سپورٹ کریں: آفاق احمد

کراچی (ڈیلی پاکستان آن لائن )مہاجر قومی موومنٹ (ایم کیو ایم حقیقی) کے چیئرمین آفاق احمد نے 12 اپریل کو کراچی میں پرامن مظاہرے کا شیڈول بتاتے ہوئے کہا ہے کہ رواں سال میں اب تک ٹریفک حادثات میں 262 جاں بحق ہوچکے ہیں، الطاف حسین اگر میرے مؤقف کی حمایت کرتے ہیں تو مجھے سپورٹ کریں۔
نجی ٹی وی "ایکسپریس نیوز" کے مطابق کراچی میں اپنی رہائش گاہ پر پریس کانفرنس کرتے ہوئے آفاق احمد نے ایک بار پھر اپیل کی کہ لوگوں سے درخواست ہے کہ 12 اپریل کو لوگ سفید پرچم لے کر گھروں سے نکلیں، مہاجروں کی طرح دیگر قومیتوں کے ساتھ بھی زیادتی ہورہی ہے۔ جنوری سے اب تک 262 لوگ ٹریفک حادثات میں مرے ہیں گزشتہ سال ساڑھے 7 سو لوگ جاں بحق ہوئے، حادثات پر حادثات ہورہے ہیں حکومت نے سرد مہری کا مظاہرہ کیا، جو لوگ جاں بحق ہوئے ان کی تکالیف زیادہ ہیں مجھے بھی گرفتار کیا گیا لیکن ہماری تکلیف کچھ نہیں ہے۔
آفاق احمد نے کہا کہ سٹریٹ کرائم میں بچوں کے سامنے باپ کو مار دیا گیا بچہ اپنے باپ کو بچانے کے لیے پتھر سے مقابلہ کررہا تھا، کسی کارکن کو پکڑنا ہو تو زمین کھود کر نکال لیتے ہیں لیکن سٹریٹ کرمنل پکڑے نہیں جاتے۔
انہوں نے کہا کہ پیپلز پارٹی بدترین اور بدعنوان پارٹی ثابت ہوئی ہے، حکومت کو جیب اور خزانے بھرنے سے فرصت نہیں ہے۔ آفاق احمد نے کہا کہ لاہور میں 8 ہزار کیمرے لگائے ہیں وہاں پولیس کو کام کرنے کی ہی ضرورت نہیں، کراچی میں ٹریفک پولیس کا سارا زور چالان کاٹنے پر ہے کیونکہ 30 فیصد ان کو ملتے ہیں۔
آفاق احمد نے کہا کہ اس شہر کی مجرم پیپلز پارٹی ہے یہ وسائل کو اپنے اوپر استعمال کرتے ہیں، جو پروجیکٹ 6 ارب کا ہوتا ہے تاخیر کے سبب 36 ارب کا ہوجاتا ہے، ہم شہر میں حفاظت سے حرکت نہیں کرسکتے جو روز گار کے لیے نکلتا ہے اس کے گھر والے پریشان رہتے ہیں۔
چیئرمین حقیقی نے کہا کہ پیپلز پارٹی کی سرپرستی میں ٹینکر مافیا پانی فروخت کررہا ہے یہ کام 30 سال سے ہورہا ہے، جزیروں میں پانی پہنچا دیا گیا مڈل کلاس علاقوں میں پانی نہیں ہے، 12 ہزار ٹینکر اربوں روپے کا پانی روزانہ فروخت کررہے ہیں۔انہوں نے کہا کہ بلوچستان اور کے پی کے میں غیر یقینی ہے ہم کراچی میں کچھ ایسا نہیں چاہتے جس سے شہر کی فضاء خراب ہوئی ہے، شہر کے لوگ خاموش ہیں انھیں مردہ یا غلام نہ سمجھا جائے، لوگ 12 اپریل کو طاقت کا مظاہرہ پرامن طریقے سے کریں گے تاکہ حالات تبدیل ہوں اور بدعنوان حکومت سے نجات ملے۔
آفاق احمد نے کہا کہ جو چاہتے ہیں کہ لوڈ شیڈنگ، پانی کی کمی اور اوور بلنگ نہ ہو وہ 12 اپریل کو نکلیں، سفید پرچم سب کی نمائندگی کررہا ہے ہر قومیت کے لوگ نکلیں یہ لسانی معاملہ نہیں ہے۔جماعت اسلامی، متحدہ قومی موومنٹ، تحریک انصاف، سنی تحریک، مرکزی مسلم لیگ ، وکلاء تنظیمیں اور دیگر سیاسی جماعتوں سے درخواست ہے کہ اس کو انسانی مسئلہ سمجھ کر اس میں شریک ہوں ۔
چیئرمین حقیقی نے کہا کہ ڈسٹرکٹ سینٹرل میں دفتر کی جگہ لے لی ہے 6 تاریخ کو 4 بجے ثمن آباد میں آفس کھل جائے گا۔  جب دفاتر میں بیٹھ کر فارم 45 بنتے ہیں تو شفاف انتخابات نہیں ہوتے۔ 12 اپریل ملیر، ڈی ایچ اے، لانڈھی ، کورنگی ،لیاقت آباد، ایف بی ایریا، نارتھ ناظم آباد سے ہمارے نمائندے نکلیں گے اور میں یوپی موڑ پرانھیں جوائن کروں گا۔
آفاق احمد نے کہا کہ پاکستان کے جغرافیے میں رہ کر جدوجہد کرنے کا قائل ہوں، ان کا مزید کہنا تھا کہ اگر الطاف حسین میرے مؤقف کی حمایت کرتے ہیں تو ان سے کہوں گا مجھے سپورٹ کریں۔