دل کا دورہ پڑنے کے بعد سابق بنگلا دیشی کپتان تمیم اقبال کی طبیعت اب کیسی ہے؟
ڈھاکہ(ڈیلی پاکستان آن لائن)سابق کپتان بنگلا دیش کرکٹ ٹیم تمیم اقبال کی صحت میں تیزی سے بہتری آ رہی ہے۔
بنگلادیشی میڈیا رپورٹس کے مطابق تمیم اقبال کو گزشتہ شب ڈھاکا سٹی کے اسپتال میں منتقل کردیا گیا، صحت میں بہتری آنے کے بعد ڈاکٹرز نے تمیم اقبال کو ڈھاکا منتقل کرنے کا فیصلہ کیا۔
یاد رہے کہ تمیم اقبال کو دل کا دورہ ڈھاکا سٹی سے باہر ساور کے علاقے میں میچ کے دوران گراؤنڈ میں دل کا دورہ پڑا تھا، تمیم اقبال کو فوری طور پر گراؤنڈ سے قریبی ہسپتال پہنچایا گیا تھا۔
تمیم اقبال کی ایمرجنسی میں کی جانے والی انجیو پلاسٹی کے بعد 48 گھنٹے اہم قرار دیئے گئے تھے تاہم بنگلادیشی میڈیا کا کہنا ہے کہ ڈاکٹرز نے تمیم اقبال کی صحت میں تیزی سے بہتری آنے کو اطمینان بخش قرار دیا ہے۔
میڈیا رپورٹس کے مطابق تمیم اقبال ڈاکٹر کی زیر نگرانی رہیں گے، انہیں مکمل آرام کی ہدایت کی گئی ہے، اگلے چند روز میں دوبارہ تمیم اقبال کی صحت کے حوالے سے مکمل معائنہ ہوگا۔
