کپل شرما شو سے باہر ہونے والی سمونا چکروتی نے دل کھول کر رکھ دیا
ممبئی (ڈیلی پاکستان آن لائن) اداکارہ سُمونا چکرورتی مشہور کامیڈی شوز کامیڈی نائٹس ود کپل اور دی کپل شرما شو میں کپل شرما کی بیوی کا کردار نبھا چکی ہیں، وہ دی گریٹ انڈین کپل شو کا حصہ نہیں رہیں۔ ایک حالیہ انٹرویو میں انہوں نے انکشاف کیا کہ کس طرح اس شو نے انہیں مالی استحکام دیا اور وہ اس کی کمائی سے ممبئی میں اپنا گھر خریدنے کے قابل ہوئیں۔
نیوز 18 کے مطابق سُمونا نے بتایا کہ وہ 10 سال تک کپل شرما کے شوز کا حصہ رہیں اور اس دوران انہیں نہ صرف بے پناہ شہرت ملی بلکہ مالی طور پر خودمختاری بھی حاصل ہوئی۔ ان کا کہنا تھا کہ وہ ایک سادہ متوسط طبقے کے بنگالی خاندان سے تعلق رکھتی ہیں، اور اس شو نے انہیں اتنی مالی آزادی دی کہ وہ ممبئی میں اپنا ذاتی گھر خرید سکیں۔
انہوں نے مزید کہا کہ خواتین کے لیے مالی آزادی آج کے دور میں بے حد ضروری ہے، اور وہ اس موقع کے لیے بے حد شکر گزار ہیں۔ ساتھ ہی انہوں نے اس شو کی بین الاقوامی مقبولیت پر بھی بات کی اور بتایا کہ یہ شو تھائی لینڈ میں بھی بہت مشہور ہے۔ ایک دلچسپ واقعہ سناتے ہوئے انہوں نے کہا کہ جب وہ ایک تھائی ریسٹورنٹ میں تھیں تو وہاں کے تمام ویٹرز اور میزبان ان کے ساتھ تصویر کھنچوانا چاہتے تھے، کیونکہ شو کو تھائی زبان میں ڈب کر کے نشر کیا گیا تھا اور ان کے لیے یہ حیرت کی بات تھی کہ وہ خود کو تھائی زبان میں بولتے ہوئے دیکھ رہی تھیں۔
کپل شرما کے نئے شو کا حصہ نہ بننے کے حوالے سے افواہیں گردش کر رہی تھیں کہ سُمونا کو شو کے بارے میں اطلاع نہیں دی گئی اور وہ زبردستی باہر کر دی گئیں۔ تاہم انہوں نے نیوز 18 کے ساتھ گفتگو میں واضح کیا کہ ایسا کچھ نہیں تھا۔ ان کا کہنا تھا کہ دی کپل شرما شو گزشتہ سال جولائی میں ختم ہو گیا تھا، اور اس کے بعد سب نے اپنی اپنی راہیں اختیار کر لیں۔ کپل شرما نے ایک نیا شو کیا اور وہ خود خطروں کے کھلاڑی میں شرکت کے لیے رومانیہ چلی گئیں۔ ان کے بقول، ان کے اور کپل شرما کے درمیان کوئی ناراضی نہیں ہے اور ان کے درمیان اچھے تعلقات قائم ہیں۔
