ذوالفقار بھٹو جونئیر نے سیاست میں آنے کی تصدیق کردی
کراچی(آئی این پی)پاکستان کی سیاست میں ایک اور نوجوان بھٹو کی آمد ہے، سماجی کارکن اور انسانی حقوق کیلئے آواز اٹھانے والے ذوالفقار علی بھٹو جونئیر متنازع چھ نہروں پر کہنا ہے کہ یہ زندگی اور موت کا سوال ہے۔ذولفقار علی بھٹو جونئیر نے ایک ٹی وی انٹرویو میں کہا کہ سندھ میں پانی نہیں ہوگا تو ناصرف انسان بلکہ بہت سے جنگلی اور آبی حیات مر جائیں گی۔ یہ ہمارا کلچرل جینوسائیڈ (ثقافتی نسل کشی) ہوگا، والڈ لائف کا بھی اور انسانیت کا بھی۔
انہوں نے کہا کہ ہماری حکومت ابھی کانپ رہی ہے، کیونکہ انہوں نے دیکھا کہ کتنے لوگ احتجاج کر رہے ہیں، اسکول کے بچے بھی احتجاج کر رہے ہیں۔ اسی لئے یہ بیانیہ تبدیل کر رہے ہیں اور منصوبے بھی بالکل سامنے تبدیل کرنے کی کوشش کر رہے ہیں۔ان کا کہنا تھا کہ یہ دریائے سندھ سے پانی نکالیں گے کیونکہ ستلج میں پانی نہیں ہے، یہ لنک کینال کی کیپیسٹی بڑھائیں گے اور دریائے سندھ کا پانی اس سے ستلج میں جائے گا۔
انہوں نے سیاست میں قدم رکھنے کے سوال پر کہا کہ میں نوڈیرو میں اعلان کیا تھا کہ میرا سیاست میں آنے کا ارادہ ہے، پاکستان پیپلز پارٹی کا شہید بھٹو گروپ ہے جو میرے بابا نے شروع کیا وہ ابھی تک موجود ہے اور امید ہے ہم اس کی قیادت کریں گے۔انہوں نے مزید کہا کہ مجھے چاہئیے کہ میں اس میں کچھ فریش نوجوان لوگ بھی شامل کروں، ہمارے ملک میں بہت سارے سیاسی یتیم ہیں جو بہت انرجیٹک ہیں لیکن ان کی کوئی تنظیم یا لیڈر شپ نہیں ہے۔
انہوں نے مزید کہا کہ مجھے اپنے ملک سے اپنے لوگوں سے بہت کچھ سیکھنا ہے، مجھے نہیں لگتا کہ میں سب کچھ جانتا ہوں، میں تیاری کر رہا ہوں۔
