تونسہ میں ایڈزکے سدباب کیلیےخصوصی مراکز قائم، آپریشنل پلان طلب،یونیسف،ڈبلیو ایچ اواورمحکمہ ہیلتھ پنجاب کا جوائنٹ مشن قائم کرنے کا فیصلہ

لاہور ( ڈیلی پاکستان آن لائن )وزیراعلیٰ پنجاب مریم نواز نے ایڈز کے رسک پر موجود پاپولیشن کے بچاؤ کے لیے مؤثر اور ٹھوس اقدامات کا حکم دیدیا۔

تفصیلات کے مطابق وزیراعلیٰ مریم نواز  کی زیر صدارت خصوصی اجلاس ہوا جس میں تحصیل تونسہ کے علاقے میں مبینہ طورپر ایڈز پھیلنے کے اسباب کا جائزہ لیا گیا۔وزیراعلیٰ  نے تحصیل تونسہ میں ایڈزکے سدباب کے لیے آپریشنل پلان طلب کرلیا۔وزیراعلیٰ مریم نواز نے ایڈز کے پھیلاؤ کے اسباب اور ذمہ داروں کا تعین کرنے کی ہدایت کی۔ اجلاس میں یونیسف،ڈبلیو ایچ اواورمحکمہ ہیلتھ پنجاب کا جوائنٹ مشن قائم کرنے کا فیصلہ کیا گیا۔ ایڈز کے سدباب کیلئے جوائنٹ مشن7تا14اپریل متاثرہ بچوں کی ہسٹری ٹریسنگ کرے گا۔ جوائنٹ مشن ایڈزکنٹر ول اوربچاؤ کیلئے وزیراعلی مریم نواز کو تجاویز پیش کرے گا۔

وزیراعلیٰ مریم نواز کی ہدایت پر متاثرہ علاقوں میں ہاؤس ہولڈ سکریننگ بھی کی جائے گی۔ وزیراعلیٰ کی ہدایت پر تونسہ تحصیل ہیڈکوارٹرز ہسپتال اوردیگر طبی مراکز میں ایڈ ز کے علاج کیلئے خصوصی مراکز قائم کر دیئے گئے۔ وزیراعلیٰ مریم نواز نے ایڈز سے متاثرہ بچوں کے مکمل فری علاج کی ہدایت کی اور کہا کہ ایڈز سے متاثرہ بچوں کے علاج میں کوئی کمی یا کوتاہی برادشت نہیں کی جائے گی۔