وزیراعظم مدینہ منورہ پہنچ گئے،گورنر شہزادہ سلمان بن سلطان نے ایئر پورٹ پر استقبال کیا
مدینہ منورہ ( مانیٹرنگ ڈیسک )وزیراعظم شہباز شریف مدینہ منورہ پہنچ گئے،گورنر شہزادہ سلمان بن سلطان نے ایئر پورٹ پر استقبال کیا
تفصیلات کے مطابق وزیراعظم محمد شہباز شریف کی مدینہ آمد پر گورنر مدینہ شہزادہ سلمان بن سلطان نے پرنس محمد بن عبدالعزیز ایئر پورٹ پر استقبال کیا۔ وزیراعظم شہباز شریف کے وفد کے ارکان میں وزیر خارجہ اسحاق ڈار اور وزیراعلیٰ پنجاب مریم نواز سمیت دیگر شامل ہیں۔ وزیراعظم مسجد نبویؐ میں روضہ رسول ﷺپر حاضری دیں گے اور نماز تراویح و قیام الیل میں شرکت کریں گے۔
" جنگ " کے مطابق اس سے پہلے جدہ میں وزیراعظم شہباز شریف اور سعودی ولی عہد محمد بن سلمان کی ملاقات ہوئی، جس میں پاکستان اور سعودی عرب نے دفاعی اور سیکیورٹی تعاون مزید مضبوط بنانے پر اتفاق کیا اور باہمی شراکت داری کو نئی بلندیوں تک پہنچانے کے عزم کا اعادہ کیا۔
وزیراعظم نے کہا کہ مضبوط دوطرفہ تعلقات باہمی اقتصادی شراکت داری میں تبدیل ہو رہے ہیں۔ پاکستان سے مسلسل تعاون پر ولی عہد کے مشکور ہیں۔
سعودی وزیر سرمایہ کاری سے ملاقات میں وزیراعظم نے سعودی سرمایہ کاروں کو ایس آئی ایف سی کے تحت مواقع تلاش کرنے کی دعوت دی۔
